२४ साउन– पानी पार्ने मनसुनी न्यून चापीय रेखा नेपालतर्फ सरिरहेकाले शनिबार बेलुकीदेखि तीन दिनसम्म देशभर वर्षा हुने भएको छ । जल तथा मौसम विज्ञान विभागका अनुसार शनिबार रातीदेखि यो रेखा नेपालको तराई नजिक आइपुग्ने सम्भावना देखिएको छ । यो रेखा नेपाल प्रवेश गरेपछि देशका अधिकांश स्थानमा पानी पर्छ ।
महाशाखाका अनुसार केही स्थानमा निकै ठूलो पानी पर्ने सम्भावना छ । धेरैजसो स्थानमा हल्कादेखि मध्यम वर्षा हुने मौसम पूर्वानुमान महाशाखाले जारी गरेको विशेष मौसम बुलेटिनमा उल्लेख छ । पानी पर्ने सम्भावना रहेकाले जलप्रकोपबाट जोगिनका लागि सतर्कता अपनाउन पनि महाशाखाले अनुरोध गरेको छ । दक्षिणतर्फ रहको मनसुनी न्यून चापीय रेखा प्रवेश गरेको क्षेत्रमा पानी पर्ने र यो अवस्था कायम रहिरहे लगातार झरी पर्नेछ । तर, यसपटक यो अवस्था धेरै दिनसम्म नलम्बिने मौसमविद्हरुले जानकारी दिएका छन् । महाशाखाका अनुसार आज बिहानैदेखि प्रदेश २ र ५ का केही स्थानमा आंशिक बदली देखिएको छ ।
देशका अन्य भागमा पनि सामान्यदेखि पूर्ण बदली भइरहेको छ । महाशाखाले आज बिहान जारी गरेको सूचनाअनुसार अहिले बागमती, गण्डकी, प्रदेश ५, कर्णाली र सुदूरपश्चिम प्रदेशका विभिन्न स्थानमा पानी परिरहेको छ । भारी वर्षाको सम्भावना रहेकाले आज प्रदेश १, २, बागमती, गण्डकी, र सुदूरपश्चिमका केही स्थानका नदीहरुमा पानीको बहाव बढ्नसक्ने महाशाखाले जानकारी दिएको छ । पानी पर्ने पहाडी क्षेत्रमा भूक्षय र पहिरो चल्ने तथा सडक एवम् हवाई यातायात प्रभावित हुने हुनाले आवश्यक सतर्कता अपनाउन भनिएको छ ।
प्रकाशित मिति २०७७ साउन २४ गते शनिवार ११:२०
