काेराेना महामारीले सिर्जना गरेकाे समस्याका कारण अहिलेसम्म विदेशबाट झन्डै ७७ हजार नेपाली स्वदेश फर्किएका छन्।
कोभिड–१९ सङ्कट व्यवस्थापन सञ्चालन केन्द्र (सीसीएमसी) का अनुसार बिहीबारसम्म जहाजमार्फत ३२ मुलुकबाट गरी ७६ हजार ९ सय ६७ नागरिक आफ्नो मुलुक फर्केका हुन्।
तीमध्ये सबैभन्दा बढी संयुक्त अरब इमिरेट्सबाट २२ हजार २ सय १४ छन् भने सबभन्दा कम श्रीलङ्काबाट ५ जना छन्। उनीहरु धेरैजसाे रोजगारीका विदेश गएका व्यक्ति हुन्।
केन्द्रका अनुसार हालसम्म कतारबाट १० हजार ३०६, कुवेतबाट ८ हजार ३३५, मलेसियाबाट ११ हजार ३५२, साउदी अरेबियाबाट ११ हजार ८१९, दक्षिण कोरियाबाट १ हजार ४४७, बहराइनबाट १ हजार २७४, ओमनबाट १ हजार १५०, अस्ट्रेलियाबाट १ हजार ९१ र टर्कीबाट ९३६ नेपाली स्वदेश फर्किएका छन्।
स्वदेश फर्कनेमा प्रदेश नं १ का १४ हजार ५४६, प्रदेश नं २ का ११ हजार ९०९, वाग्मती प्रदेशका १८ हजार २४७, गण्डकी प्रदेशका ८ हजार ९७३, प्रदेश नं ५ का ११ हजार ४५०, कर्णाली प्रदेशका १ हजार ५१८ र सुदुरपश्चिम प्रदेशका १ हजार ७३७ रहेको केन्द्रले जनाएको छ।
फर्कनेमध्ये ८ हजार ४ सय ९७ जनाको भने प्रदेश विवरण प्राप्त नभएको जनाइएको छ। रासस
प्रकाशित मिति २०७७ असोज १० गते शनिवार ०४:२७
